Belagavi News In Kannada | News Belgaum

ಬೆಳಗಾವಿನಗರಿಗೆ ತಂಪೆರೆದ ಮಳೆರಾಯ

ಬೆಳಗಾವಿ:  ಮಳೆ ಸುರಿಯದೇ ಬೇಸಿಗೆಯ ಒಣ ವಾತಾವರಣ ಮುಂದುವರೆದಿದ್ದ ಬೆಳಗಾವಿ ಪರಿಸರ ಶುಕ್ರವಾರ ಬದಲಾವಣೆ ಕಂಡಿದ್ದು ತುಂತುರು ಮಾದರಿಯ ಮಳೆ ಸುರಿದು ಮಳೆಗಾಲವಿದು ಎಂದು ಜನರಿಗೆ ನೆನಪಿಸಿದೆ..

ಮಳೆಗೆ ಹೆಸರಾದ ಮಲೆನಾಡ ಗಡಿಯ ಬೆಳಗಾವಿಯಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಕಡಿಮೆಯಾಗಿದ್ದರೂ ಈ ವರ್ಷವಂತೂ ತಿಂಗಳೂ ಕಳೆದರೂ ಮಳೆ ಹನಿಯಿಲ್ಲದೇ ಬೇಸಿಗೆಯ ಉಷ್ಣ ವಾತಾವರಣ ಮುಂದುವರೆದಿತ್ತು. ನಗರಕ್ಕೆ ನೀರು ಪೂರೈಸುವ ಹಿಡಕಲ್ ಹಾಗೂ ರಕ್ಕಸಕೊಪ್ಪ ಜಲಾಶಯಗಳಲ್ಲಿ ನೀರು ತಳಕ್ಕೆ ತಲುಪಿ ಕನಿಷ್ಠ ಹತ್ತು ದಿವಸಕ್ಕೊಮ್ಮೆ ಒಂದು ತಾಸು ನೀರು ನಲ್ಲಿಗಳಲ್ಲಿ ನೀರು ಕಾಣುತ್ತಿದ್ದ ಜನತೆಯ ಮುಖಭಾವ ಶುಕ್ರವಾರ ಹೇಳಿಕೊಳ್ಳುವಂಥ ಮಳೆಯಾಗದಿದ್ದರೂ ಹೇಗೋ ಈ ವರ್ಷದ ‘ಮಾನ್ಸೂನ್ ಸೆಟ್’ ಆಯ್ತು ಬಿಡಿ ಎಂಬ ನಿರಾಳತೆ ಪಡೆದಂತಾಗಿದೆ..

ಇಡೀ ದೇಶದಲ್ಲೇ ಮಾನ್ಸೂನ್ ವಿಳಂಬವಾದ ವರದಿಗಳು ಬಿತ್ತರವಾಗುತ್ತಿದ್ದು ದೇಶದಲ್ಲಿ ಈ ಬಾರಿ ಬರಗಾಲ ಬರುವ ಆತಂಕ ಎದುರಾದ ಮಧ್ಯೆ ಜಿಲ್ಲೆಯಲ್ಲಿ ಹೆಚ್ಚು ಮಳೆ ಪಡೆಯುವ ನಿತ್ಯಹರಿದ್ವರ್ಣದ ದಟ್ಟ ಕಾಡಿಗೆ ಹೆಸರಾದ ಖಾನಾಪುರ ತಾಲೂಕಿನಾದ್ಯಂತ ಈಗಾಗಲೇ ಬಿತ್ತಿರುವ ಭತ್ತದ ಬೆಳೆ ಮಳೆಯಿಲ್ಲದೇ ಕಳೆಗುಂದಿದ ದೃಷ್ಯ ಮನಕುಲುವಂತಿದೆ. ಇನ್ನೂ ಜಿಲ್ಲೆಯ ಇನ್ನಿತರ ಕಡಿಮೆ ವಾಡಿಕೆ ಮಳೆ ಪಡೆಯುವ ತಾಲೂಕುಗಳ ಪರಿಸ್ಥಿತಿ ಕೃಷಿಗೆ ಬಿಡಿ, ಕುಡಿಯಲು ನೀರಿಗೆ ಹಾಹಾಕಾರ ಎದ್ದಂತಾಗಿದೆ. .

ಜನ ಹಾಗೂ ಆಡಳಿತ ಜಿಲ್ಲೆಯಲ್ಲಿ ಮಾನ್ಸೂನ್ ಕಳೆಗಟ್ಟಿ ಈಗ ಸುರಿದೀತೋ ಇನ್ನೊಂದಿಷ್ಟು ಹೊತ್ತಲ್ಲಿ ಸುರಿದೀತೋ ಎಂಬ ನಿರೀಕ್ಷೆ ಹೊತ್ತು ಆಕಾಶ ದಿಟ್ಟಿಸುತ್ತಿತ್ತು. ಶುಕ್ರವಾರ ಬೆಳಗಾವಿ ಆಕಾಶದಲ್ಲಿ ಮೋಡಗಳು ದಟ್ಟೈಸಿ ಬಿಸಿಲು ತೆರೆ ಮರೆಗೆ ಸರಿದಿದೆ. ಬಿರುಸಿಲ್ಲವೆನಿಸಿದರೂ ಮಳೆ ನೆಲ ಹಸಿ ಮಾಡಿ ಜನರ ಮನಸ್ಸು ತಂಪುಗೊಳಿಸಿದೆ.