Belagavi News In Kannada | News Belgaum

ದೇಶದ ಗಮನ ಸೆಳೆದಿದ್ದ ಬೆಳಗಾವಿ ಲೋಕಸಭೆ ಚುನಾವಣೆ..!

ಬೆಳಗಾವಿ: 1996ರಲ್ಲಿ ನಡೆದ  ಬೆಳಗಾವಿ ಲೋಕಸಭಾ ಕ್ಷೇತ್ರದ ಚುನಾವಣೆಯಲ್ಲಿ ಒಟ್ಟು 456 ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸಿ  ಇಡೀ ದೇಶದ ಗಮನ ಸೆಳೆಯಲು ಕಾರಣವಾಗಿತ್ತು.

ಹೌದು….28 ವರ್ಷಗಳ ಹಿಂದೆ ಬೆಳಗಾವಿ ಲೋಕಸಭೆ ಚುನಾವಣೆಗೆ ಒಟ್ಟು 456 ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸಿದ್ದರು. ಇದಕ್ಕೆ ಅತಿ ದೊಡ್ಡ ಪ್ರಮಾಣದ ಬ್ಯಾಲೆಟ್‌ ಪೇಪರ್‌ ಬಳಸಲಾಗಿತ್ತು. 2-3 ದಿನಗಳ ಕಾಲ ನಿರಂತರವಾಗಿ ಅಧಿಕಾರಿಗಳು ಮತ ಎಣಿಕೆ ಮಾಡಿದ್ದರು. ಇದಕ್ಕಿಂತ ಮುಂಚೆ 1985 ರಲ್ಲಿ 305 ಅಭ್ಯರ್ಥಿಗಳು ಬೆಳಗಾವಿ ವಿಧಾನಸಭೆಗೆ ನಾಮಪತ್ರ ಸಲ್ಲಿಸಿ ಕಣದಲ್ಲಿ ಉಳಿದಿದ್ದರು.
ಮತದಾನ ಚೀಟಿ ನೀಡುವಂತೆ ಜಾಗೃತಿ ಮೂಡಿಸಲು 1985 ರಲ್ಲಿ ಕನ್ನಡಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಮತದಾರರನ್ನು ನಿಲ್ಲಿಸಿದ್ದರೆ, 1996ರಲ್ಲಿ ಮತ ವಿಭಜನೆ ಮಾಡಲು 1996 ರಲ್ಲಿ ಎಂಇಎಸ್‌ನವರು 452 ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದರು. 2019 ರ ಲೋಕಸಭೆ ಚುನಾವಣೆಯಲ್ಲಿ ಎಂಇಎಸ್‌ನವರು 50ಕ್ಕೂ ಹೆಚ್ಚು ಜನರಿಂದ ನಾಮಪತ್ರ ಸಲ್ಲಿಸಿ ಕಣಕ್ಕಿಳಿಸಿದ್ದರು.
ಬೆಳಗಾವಿ ಲೋಕಸಭೆಗೆ ನಾಮಪತ್ರ ಸಲ್ಲಿಕೆ ಹೆಚ್ಚಿನ ಸಂಖ್ಯೆಯಲ್ಲಿ ಆಗಿತ್ತು. ಆಗ 64 ಅಭ್ಯರ್ಥಿಗಳು ಕಣದಲ್ಲಿ ಉಳಿದುಕೊಂಡಿದ್ದರು. ಒಬ್ಬರು ನಾಮಪತ್ರ ಹಿಂಪಡೆದುಕೊಂಡರೆ ನೋಟಾ ಸೇರಿ 64 ಹೆಸರುಗಳನ್ನು ನಾಲ್ಕು ಮತಯಂತ್ರಗಳಲ್ಲಿ ಅಳವಡಿಸಲು ಸಾಧ್ಯವಿತ್ತು. ಆಗಲೂ ಅಧಿಕಾರಿಗಳಿಗೆ ಸಮಸ್ಯೆ ಎದುರಾಗಿತ್ತು.


ಭಾಷಾದ್ವೇಷ ಹುಟ್ಟು ಹಾಕುತ್ತ ದಬ್ಬಾಳಿಕೆ ರಾಜಕಾರಣ ಮಾಡುತ್ತ ಬಂದಿದ್ದ ಎಂಇಎಸ್‌ಗೆ ‘ಮಹಾಜನ್‌ ವರದಿ’ ಬರೆ ಎಳೆದಿತ್ತು. ಕೇಂದ್ರ ಮತ್ತು ಮಹಾರಾಷ್ಟ್ರದ ನಾಯಕರು ಎಂಇಎಸ್‌ ಕೈ ಬಿಟ್ಟಿದ್ದರು. ಇದರಿಂದ ಅಸ್ತಿತ್ವ ಕಳೆದುಕೊಂಡಿದ್ದ ಎಂಇಎಸ್‌ ನಾಯಕರು ರಾಜಕೀಯ ಅಸ್ತಿತ್ವ ಉಳಿಸಿಕೊಳ್ಳಲು ಖೊಟ್ಟಿ ಮತದಾನದ ಮೊರೆ ಹೋಗಿದ್ದರು. ಅಂದು ಗಡಿ ಭಾಗದಲ್ಲಿ ಕನ್ನಡ ಕಟ್ಟುವ ಕೆಲಸ ಮಾಡುತ್ತಿದ್ದ ಕನ್ನಡ ಪತ್ರಿಕೆಗಳ ಸಂಪಾದಕರು ‘ಸಂಪಾದಕರ ವೇದಿಕೆ’ ನಿರ್ಮಿಸಿಕೊಂಡು ಎಂಇಎಸ್‌ನ ಖೊಟ್ಟಿ ಮತದಾನ, ದಬ್ಬಾಳಿಕೆ ರಾಜಕಾರಣವನ್ನು ಚುನಾವಣಾ ಆಯೋಗ ಹಾಗೂ ದೇಶದ ಗಮನ ಸೆಳೆಯಲು 1985ರ ಚುನಾವಣೆಯಲ್ಲಿ ‘ಚುನಾವಣೆ ಚಳವಳಿ’ಗೆ ಚಾಲನೆ ನೀಡಿದ್ದರು. ಚಳವಳಿಗೂ ಮೊದಲು ಪಾರದರ್ಶಕ ಚುನಾವಣೆ ನಡೆಸುವ ನಿಟ್ಟಿನಲ್ಲಿ ಗುರುತಿನ ಚೀಟಿ ಕಡ್ಡಾಯಗೊಳಿಸುವಂತೆ ಸಂಪಾದಕರ ವೇದಿಕೆ ಚುನಾವಣೆ ಆಯೋಗಕ್ಕೆ ಪತ್ರ ಬರೆದಿತ್ತು. ಆಯೋಗದಿಂದ ಉತ್ತರ ಬಾರದೇ ಇದ್ದಾಗ ಚಳವಳಿ ಹೋರಾಟದ ಹಾದಿ ತುಳಿದಿತ್ತು. ಕನ್ನಡ ಪರ, ದಲಿತ ಸಂಘಟನೆ ಸೇರಿದಂತೆ ಪಕ್ಷಾತೀತ ಬೆಂಬಲ ಮತ್ತು ಧನ ಸಹಾಯದೊಂದಿಗೆ ಅಂತಿಮವಾಗಿ ವೇದಿಕೆಯಿಂದ ಒಟ್ಟು 305 ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸುವ ಮೂಲಕ ಚುನಾವಣೆ ಇತಿಹಾಸದಲ್ಲಿ ಹೊಸ ಅಧ್ಯಾಯ ಬರೆಯಿತು.
ನಾಮಪತ್ರ ಸಲ್ಲಿಸಿದ್ದ 314 ಅಭ್ಯರ್ಥಿಗಳ ಪೈಕಿ 301 ಅಭ್ಯರ್ಥಿಗಳು ಅಂತಿಮವಾಗಿ ಕಣದಲ್ಲಿ ಉಳಿದರು. 120 ಚಿನ್ನೆಗಳು ಮಾತ್ರ ಬಳಕೆಯಲ್ಲಿದ್ದ ಅಭ್ಯರ್ಥಿಗಳಿಗೆ ಆಯೋಗದಿಂದ ಮನಸ್ಸಿಗೆ ಬಂದ ಚಿಹ್ನೆ ವಿತರಣೆ ಮಾಡಲಾಗಿತ್ತು! ಅಭ್ಯರ್ಥಿಗಳು ಮೃತಪಟ್ಟರೆ ಚುನಾವಣೆ ಮುಂದೂಡಬೇಕೆನ್ನುವ ಉದ್ದೇಶದಿಂದ 90 ವರ್ಷ ಮೀರಿದ ಅಭ್ಯರ್ಥಿಗಳನ್ನೂ ಸ್ಪರ್ಧೆಗೆ ನಿಲ್ಲಿಸಲಾಗಿತ್ತು. ಇದರಿಂದ ಎಚ್ಚೆತ್ತ ಆಯೋಗ 1985ರ ನಂತರದ ಚುನಾವಣೆಯಲ್ಲಿ ರಾಷ್ಟ್ರೀಯ ಪಕ್ಷದ ಅಭ್ಯರ್ಥಿ ಮೃತಪಟ್ಟರೆ ಮಾತ್ರ ಚುನಾವಣೆ ಮುಂದೂಡುವ ನಿಯಮ ಜಾರಿಗೆ ತಂದಿತು. ಅಭ್ಯರ್ಥಿಗಳ ಸಂಖ್ಯೆ ನಿಯಂತ್ರಣಕ್ಕಾಗಿ ಈ ಮೊದಲಿನ ಠೇವಣಿ ಮೊತ್ತವನ್ನು ದುಪ್ಪಟ್ಟು ಮಾಡಿತು. ಎಲ್ಲಕ್ಕಿಂತ ಮುಖ್ಯವಾಗಿ ಮತದಾರರ ಗುರುತಿನ ಚೀಟಿ ಕಡ್ಡಾಯಕ್ಕೆ ಚಿಂತನೆ ಆರಂಭಿಸಿದ್ದು ‘ಚುನಾವಣಾ ಚಳವಳಿ’ಯ ಪರಿಣಾಮ. ಅಂತಿಮವಾಗಿ 301 ಅಭ್ಯರ್ಥಿಗಳಿದ್ದ ಚುನಾವಣೆಯಲ್ಲಿ ಎಂಇಎಸ್‌ ಅಭ್ಯರ್ಥಿ ಗೆಲುವು ಸಾಧಿಸಿದರೂ ಚುನಾವಣಾ ಪ್ರಕ್ರಿಯೆಗಳಿಗೆ ಹೊಸ ರೂಪ ನೀಡುವಲ್ಲಿ ಕನ್ನಡಿಗರು ಗೆಲುವು ಸಾಧಿಸಿದ್ದರು.